認錯 !？

每年到依個時候最熱門既話題，當然係會考放榜啦。 已前考評局都係錯漏百出架勒。 不過錯多數係唔見卷呀，出錯題目呀果類。今年真係好突破，黎一次 “計錯分數印錯單” 。每年會考生同佢地既家長已經面對好大既壓力。考得唔好仲要訓街等派表。香港既制度又好獨特，學校要限時限刻收生，考得唔好又要等聯招。你都唔好話唔苦。

今次考評局反應都算快 (相對政府部門而言)，馬上搵人出黎祭旗以洩民憤。但係佢地個主席尋日記招會講既野就真係好有問題，大概內容如下：

“我想解釋下今次既事件………………..(下刪數百字)。我對於今次事件覺得好遺憾同要向受影響既同學道歉 (你仲做得乜？)。我地已經搵人出黎祭旗 (依句我加既)。

我對今次同事處理今次事件既效率同反應感到非常滿意 …………………(下刪數百讚美字句)”

“滿意” !？ 成件事我唔覺得有應該滿意既地方。做錯要認，打就要企定。比人打完都仲要番個尾彩？ 依就係今日既官場文化？ 我就真係覺得好遺憾囉。依樣係一個對待錯誤既正覺態度咩？你有無顧及受害者既感受呢？情形有似有人飲醉酒搾車撞親人，不過佢讚番自己報警報得快，救番一條人命。

睇黎曾先生既特首運已經行得七七八八。佢自己最近有個 “行政指引” 風波。 佢既手下就接二連三犯錯。睇黎佢要睇緊工作同佢既手下，好過日日同設計師傾佢個錦鯉池點樣起法丫。